రేవంత్ రాజీనామా చేస్తే.. నేను సీఎం అవుతా: హరీష్ రావు

తెలంగాణలో అధికార, ప్రతిపక్ష నేతల మధ్య మాటల యుద్ధం నడుస్తోంది. అసెంబ్లీలో కేసీఆర్ పై సీఎం రేవంత్ రెడ్డి చేస్తున్న వ్యాఖ్యలకు కేటీఆర్, హరీష్ రావు కౌంటర్ ఇస్తున్నారు. ఈ నేపథ్యంలోనే కాంగ్రెస్ ప్రభుత్వం వెంటనే మేడిగడ్డ పునరుద్ధరణ చేయాలని హరీష్ రావు డిమాండ్ చేశారు. కాంగ్రెస్ సర్కారుకు ఆ పని చేతకకపోతే దిగిపోయి.. ప్రభుత్వ బాధ్యతలు తమకు అప్పజెప్పాలన్నారు. ముఖ్యమంత్రిగా రేవంత్ రెడ్డి రాజీనామా చేస్తే.. తాను సీఎంగా ప్రమాణ స్వీకారం చేసి.. మేడిగడ్డ పునరుద్ధరణ పనులు చేసి చూపిస్తానంటూ సవాల్ విసిరారు. బాధ్యతలు స్వీకరించేందుకు తాను సిద్ధంగా ఉన్నాననంటూ హరీష్ రావు తెలిపారు.